| 
ໂດຍປະຕິບັດຕາມ ຂໍ້ຕົກລົງ ຂອງ ນາຍົກລັດຖະມົນຕີ ສະບັບເລກທີ 37/ນຍ ລົງວັນທີ 30
ກັນຍາ 1999 ວ່າດ້ວຍ ການຄຸ້ມຄອງ ແລະ ການພັດທະນາຂະແໜງນ້ຳປະປາ, ກະຊວງ ຄົມມະນາຄົມ
ຂົນສົ່ງ ໄປສະນີ ແລະ ກໍ່ສ້າງ ໄດ້ເອົາໃຈໃສ່ ອຳນວຍຄວາມສະດວກ, ປະສານງານ ແລະ
ຊີ້ນຳ ທຸກ ໆ ກິດຈະການພັດທະນາ ລະບົບນ້ຳປະປາ ແລະ ການກຳຈັດນ້ຳເປື້ອນ ໃນບັນດາຕົວເມືອງໃຫຍ່
ແລະ ຕົວເມືອງນ້ອຍ ຢູ່ໃນຂອບເຂດ ທົ່ວປະເທດ; ພ້ອມທັງ ໄດສົ່ງເສີມ, ປຸກລະດົມ ຂົນຂວາຍ ແລະ ນຳໃຊ້ໝົດ ທຸກຊັບພະຍາກອນ
ມາພັດທະນານ້ຳປະປາ ເພື່ອໃຫ້ສາມາດບັນລຸໄດ້ຕາມ ຈຸດປະສົງ ແລະ ເປົ້າໝາຍ
ທີ່ວາງໄວ້.
ໃນຊຸມປີທີ່ຜ່ານມາ ການພັດທະນານ້ຳປະປາ ໄດ້ປະສົບຜົນສຳເລັດ ເປັນຢ່າງດີ,
ທຸລະກິດ ນ້ຳປະປາ ໄດ້ມີການເຕີບໃຫຍ່ຂະຫຍາຍຕົວ ຢ່າງໄວວາ ໃນຂອບເຂດທົ່ວປະເທດ.
ອົງການນ້ຳປະປາ ໄດ້ຖືກສ້າງຕັ້ງຂື້ນ ແລະ ພວມໄດ້ຮັບການປັບປຸງ ໃຫ້ເຕີບໃຫຍ່ເຂັ້ມແຂງ
ຂື້ນເທື່ອລະກ້າວ ເພື່ອ ດຳເນີນ ພາລະບົດບາດດັດສົມການດຳເນີນທຸລະກິດນ້ຳປະປາ
ດັ່ງກ່າວ ໃຫ້ສາມາດ ສະໜອງການບໍລິການໄດ້ ຕາມຄວາມຕ້ອງການ ແລະ ຄວາມມຸ້ງຫວັງ ຂອງ
ທົ່ວສັງຄົມ ແລະ ມີຄວາມຍືນຍົງ.
ປັດຈຸບັນນີ້, ກະຊວງ ຄຂປກ ກຳລັງຮຽບຮຽງຄືນໃໝ່ ຮ່າງດຳລັດ ວ່າດ້ວຍ ການດັດສົມ
ການດຳເນີນທຸລະກິດນ້ຳປະປາ. ໃນຮ່າງດຳລັດດັ່ງກ່າວ ຄະນະຊີ້ນຳ ຂະແໜງນ້ຳປະປາ
ຈະຖືກປ່ຽນ ຊື່ມາເປັນ ຄະນະຊີ້ນຳການດັດສົມການດຳເນີນທຸລະກິດນ້ຳປະປາ ຊຶ່ງຈະມີໜ້າທີ່ຊີ້ນຳ
ອົງການນ້ຳປະປາ ໃຫ້ປະຕິບັດໜ້າທີ່ ຂອງຕົນ ໂດຍສອດຄ່ອງກັບ ແນວທາງນະໂຍບາຍ, ກົດໝາຍ,
ຂໍ້ກຳນົດ ກົດລະບຽບ ແລະ ລະບຽບການ ຂອງ ລັດຖະບານ ແລະ ມີຫນ້າທີ່ ໄກ່ເກ່ຍຂໍ້ຂັດແຍ່ງ
ທີ່ເກີດຂື້ນ ລະຫວ່າງ ບັນດາ ຜູ້ດຳເນີນທຸລະກິດນ້ຳປະປາ ແລະ ອົງການນ້ຳປະປາ. ຄະນະຊີ້ນຳ
ການດັດສົມການດຳເນີນທຸລະກິດ ນ້ຳປະປາ ຈະປະກອບດ້ວຍສະມາຊິກ ຈາກ
ຫຼາຍພາກສ່ວນທີ່ແຕກຕ່າງກັນລວມທັງ ຕົວແທນຜູ້ບໍລິໂພກ, ຕົວແທນຜູ້ດຳເນີນທຸລະກິດນ້ຳປະປາ
ແລະ ຜູ້ຕາງໜ້າ ຂອງ ອົງການຈັດຕັ້ງຕ່າງ ໆ ທີ່ກ່ຽວຂ້ອງ ຈາກ ພາກສ່ວນລັດ.
ຜົນສຳເລັດອັນໃຫຍ່ຫຼວງ ໃນເບື້ອງຕົ້ນຂອງພວກເຮົາແມ່ນ ທ່ານ ນາຍົກລັດຖະມົນຕີ
ໄດ້ຮັບຮອງເອົາ ນະໂຍບາຍລາຄານ້ຳປະປາ ຂອງ ສປປ ລາວ ພາຍໃຕ້ດຳລັດ ສະບັບເລກທີ
57/ນຍ ລົງວັນທີ 07 ພຶດສະພາ 2004; ນະໂຍບາຍລາຄານ້ຳປະປານີ້ ຈະເປັນເຄື່ອງມືອັນສຳຄັນ ໃຫ້ແກ່
ອົງການນ້ຳປະປາ ໃນການດັດສົມ ການດຳເນີນ ທຸລະກິດນ້ຳປະປາ. ໃນຕໍ່ຫນ້ານີ້ ອົງການນ້ຳປະປາ
ຈະໄດ້ຄົ້ນຄວ້າ ສ້າງຄູ່ມືລະອຽດ ສຳລັບ ການກຳນົດລາຄານ້ຳປະປາ ເພື່ອ ຊຸກຍູ້ສົ່ງເສີມ ໃຫ້ບັນດາ
ຜູ້ດຳເນີນທຸລະກິດນ້ຳປະປາ ແລະ ອຳນາດການປົກຄອງທ້ອງຖິ່ນ ໃນຂອບເຂດທົ່ວປະເທດ ຈັດຕັ້ງ
ປະຕິບັດ ນະໂຍບາຍ ດັ່ງກ່າວ ໃຫ້ປະກົດເປັນຈິງ.
ກະຊວງ ຄົມມະນາຄົມ ຂົນສົ່ງ ໄປສະນີ ແລະ ກໍ່ສ້າງ ພວກຂ້າພະເຈົ້າ ຈະສືບຕໍ່ໃຫ້
ການສະໜັບສະໜູນ ແລະ ເອື້ອອຳນວຍ ຄວາມສະດວກ ໃຫ້ແກ່ ອຳນາດການປົກຄອງທ້ອງຖິ່ນ ໃນ
ການຄຸ້ມຄອງ ແລະ ພັດທະນາ ນ້ຳປະປາ ໃຫ້ມີປະສິດທິຜົນ ແລະ ມີ ຄວາມຍືນຍົງຕະຫລອດໄປ.
ລັດຖະມົນຕີວ່າການ
|
ອອກແບບ
ແລະ ສ້າງໂດຍ
