ໂດຍປະຕິບັດຕາມ ແຈ້ງການ ຂອງ ຫ້ອງວ່າການສຳນັກງານນາຍົກລັດຖະມົນຕີ ສະບັບ ເລກທີ 1089/ຫສນຍ ລົງວັນທີ 4 ກໍລະກົດ1997 ກ່ຽວກັບ ການເຫັນດີຂອງຂັ້ນເທິງ ໃຫ້ມອບໂອນ ສາຂາ ຂອງບໍລິສັດນ້ຳປະປາລາວ ທີ່​ຕັ້ງຢູ່ໃນແຕ່ລະແຂວງ ໄປຂື້ນກັບ ການ​ຄຸ້ມຄອງ ​ຂອງ​ ອົງ​ການປົກຄອງທ້ອງຖິ່ນ ໂດຍກົງ, ສາຂາ​ ຂອງ ບໍລິ​ສັດນ້ຳປະປາລາວ ຢູ່ໃນແຕ່ລະແຂວງ ແລະ ເຂດພິເສດ ໄດ້ຖືກຍົກລະດັບ ໃຫ້ກາຍ​ເປັນ ລັດ​ວິ​ສາ​ຫະ​ກິດນ້ຳ​ປະ​ປາ​ແຂ​ວງທີ່ກ່ຽວຂ້ອງ ແລະ ລັດ​ວິ​ສາ​ຫະກິດ​ນ້ຳ​ປະປາເຂດ​ພິເສດ ແລະ ພ້ອມ​ດຽວກັນ ບໍລິສັດນ້ຳປະປາລາວເອງ ກໍກາຍມາເປັນ ລັດວິສາຫະກິດນ້ຳປະປານະຄອນຫຼວງ.

ອົງການນ້ຳປະປາ ໄດ້ຖືກສ້າງຕັ້ງ​ຂື້ນ ແລະ ໄດ້ຮັບການມອບໝາຍ ໃຫ້ເປັນອົງການດັດສົມ ການດຳເນີນທຸລະກິດນ້ຳປະປາ. ອົງການນ້ຳປະປາ ມີໜ້າທີ່ ສະໜັບສະໜູນ, ຊ່ວຍເຫຼືອ ແລະ ດັດສົມ ເພື່ອໃຫ້ບັນດາ ລັດວິສາຫະກິດນ້ຳປະປາ ທັງໝົດ ໃນຂອບເຂດທົ່ວປະເທດ ປັບປຸງ ການປະຕິບັດງານ ຂອງ ຕົນ ໃຫ້ດີຂື້ນເທື່ອລະກ້າວ, ຮັບປະ​ກັນ​ ​ການ​ບໍ​ລິ​ການ ທີ່​ມີ​ຄຸນຄ່າ​ສູງ​ສຸດ  ແລະ ມີຄວາມຍືນຍົງ ແກ່ ລູກຄ້າຂອງຕົນ.

ວິໄສທັດ ຂອງ ພວກເຮົາ ແມ່ນ ໂຄງລ່າງສະໜອງນ້ຳປະປາອັນດັບໜຶ່ງ ທີ່ໃຫ້ການບໍລິການ ດີເລີດ ເຊິ່ງສາມາດ ສະແດງໃຫ້ຜູ້ບໍລິໂພກ ເຫັນໄດ້ ຄຸນຄ່າສູງສຸດ ທັງໃນປັດຈຸບັນ ແລະ ອະນາຄົດ. ພາລະກິດ ຂອງ ພວກເຮົາ ແມ່ນ ທຳການດັດສົມແນວໃດ ໃຫ້ສາມາດ ສະໜອງນ້ຳທີ່ດຶ່ມໄດ້, ມີ ຄວາມຍືນຍົງ ແລະ ໃຫ້ສາມາດຊື້ໄດ້ ສຳລັບ ໝົດທຸກຄົນ ເມື່ອເຖິງປີ 2015.

ຫົວໜ້າອົງການນ້ຳປະປາ

ທ່ານ ໜູເຜືອກ ວີຣະບຸດ